【全職家長嘅困局】

作為全職父親或母親其實唔會比雙職父母輕鬆，除咗照顧日常起居，打理家頭細務之外，更要指導小朋友嘅學業、興趣同其他方面嘅發展。而如果小朋友患有自閉症的話，就更需要投放大量精神、耐性同時間。較有經濟能力嘅家庭，可能可以聘請工人姐姐幫手做家務，減輕全職爸爸或者媽媽嘅工作量，令佢地可以有較多時間同耐性去集中照顧自閉症小朋友。

但假設經濟能力唔許可，又或者需要照顧其他兄弟姊妹的話，即使係全職父母，都可能會覺得分身不暇。喺照顧自閉症小朋友嘅時候，時間同精神上嘅消耗之大，難免會有種力不從心嘅感覺。

曾經有媽媽因為需要照顧自閉症小朋友，而放棄一份為佢帶來成功感嘅理想工作，但喺照顧小朋友期間卻遇上前所未有嘅困難，令佢感到十分挫敗，亦將佢嘅耐性一點一點磨蝕，甚至開始會有埋怨小朋友嘅諗法。全職父母嘅困局人人唔同，遇上樽頸位時，家長一方面可以嘗試調節自己嘅期望，一方面亦應主動向親友傾訴或者尋求協助，從死胡同中走出來，重新出發。

黃汝明醫生提醒：以上內容僅供參考，所有預防及治療方法都有不同的成效、副作用及風險。如有懷疑，請向主診醫護人員查詢。