雙職父母日頭要做嘢，放工之後先擠到少少時間畀自閉症小朋友，工作同家庭兩方面都需要兼顧，佢哋面對嘅壓力會唔會大啲？以為全職媽媽就會相對輕鬆？但如果一個人要湊兩、三個小朋友，身邊又無人可以提供支援，佢哋又可以點樣應付？更甚就係面對四大長老嘅管教挑戰，真係少啲心力都把持唔住。

面對以上咁多問題，相信唔少自閉症小朋友嘅家長都會感到好無助。家長可以點樣處理？留意一連幾個星期黃汝明醫生嘅講解啦！

好多雙職父母都希望自己花多啲時間陪仔女，但無奈時間有限，所以父母會希望喺陪伴嘅過程中，透過形形式式嘅訓練，為自閉症小朋友帶來正面嘅改變。但呢種陪伴嘅方式相對目標為本，對小朋友嚟講，親子時間變咗訓練時間，忽略咗小朋友其實係希望父母陪伴自己玩樂一下，而唔係嚴厲嘅督促、追功課，逼得太緊，反而令親子關係變得緊張。

由於自閉症小朋友嘅表達能力及解難能力較弱，佢地未必可以清晰地表達到自己嘅心聲，變相會用發脾氣及重覆性嘅活動嚟表達不滿，從結果嚟睇，自閉症嘅徵狀或會更明顯、社交能力亦更差，甚至會出現過激嘅暴力或自殘行為，嚟宣泄不滿或對抗父母。咁到底可以點樣改善親子關係，避免困喺呢個惡性循環當中呢？

親子關係緊張，其實可能係源於父母同子女嘅期望唔同，呢個時候雙職父母可以嘗試調整一下自己嘅期望，並考慮究竟乜嘢對自己及小朋友嚟講係最重要？玩樂、學業同訓練對自閉症小朋友嘅發展都有重要嘅角色，重新安排優先次序有助分配時間資源，提升親子時間嘅質量。而優質嘅親子時間，除咗有助小朋友嘅身心健康發展之外，亦有助改善親子關係，令小朋友成為調劑家長心情嘅最好良藥，減輕家長嘅精神壓力。家長不妨透過同小朋友出外或者玩吓遊戲，拉近雙方嘅期望，將親子關係放喺最優先位置。

除咗親子關係，唔少學校都講求融合教育，家校都期望自閉症小朋友同其他小朋友睇齊，對於忙碌嘅雙職父母而言，壓力可能會加倍！如果家長未能理清同疏導自己嘅壓力同情緒，就更加難以處理小朋友嘅情緒… 雙職自閉症家庭，何去何從？

遇上重重困難，家長唔應該將所有擔子放喺自己身上。雖然自閉症小朋友可能不善表達，但佢地都會感受到來自父母嘅負面情緒，覺得唔開心，然後透過發脾氣及重覆性嘅行為嚟表達，表現比平時更明顯嘅病徵。如果家長發現自己嘅壓力指數或者情緒不勝負荷的話，應該主動尋求身邊人嘅協助，減輕自己嘅壓力，避免畀自己同小朋友陷入負面情緒嘅惡性循環之中。學校、社工以及身邊有親友，亦可適時並主動地介入提出協助。

黃汝明醫生提醒：以上內容僅供參考，所有預防及治療方法都有不同的成效、副作用及風險。如有懷疑，請向主診醫護人員查詢。